एजेन्सी । इङलिस प्रिमियर लिग फुटबलमा आर्सनललाई पराजित गर्दै टोटनहम हटस्पर्स तालिकाको शिर्ष स्थानमा उक्लिएको छ ।
गएराति सम्पन्न लण्डन डर्वीमा टोटनहमले आर्सनललाई २-० ले हराउन सफल भयो । आफ्नै घरेलु मैदानमा भएको खेलमा टोटनहमलाई जिताउन ह्यारी केन तथा ह्युङ मिन सोनले १/१ गोल गरे ।
खेलको १३ औं मिनेटमा सोनको पासमा केनले गोल गर्दै आर्सनल विरुद्ध टोटनहमलाई अग्रता दिलाएका थिए ।
मध्यान्तर अगाडिको अन्तिम मिनेटमा केनको पासमा सोनले गोल गरेपछि खेलमा टोटनहमले २-० को अग्रता बनायो ।
मध्यान्तर पछि दुबै टिमबाट कुनै गोल हुन सकेन र खेल टोटनहमले २-० ले जित्यो । यो सिजन उत्कृष्ट प्रदर्शन गरिरहेको ह्यारी केन तथा ह्युङ मिन सोनको जोडी फेरि एकपटक चम्किदा टोटनहम सहज जितसाथ प्रिमियर लिगको शिर्ष स्थानमा पुग्न सफल भयो । लिगमा खराब प्रदर्शन गरिरहेको आर्सनललाई भने यो नतिजाले थप निराश बनाएको छ ।
उ ११ खेलपछि १३ अंक जोड्दै तालिकाको १५ औं स्थानमा झरेको छ । यसले पहिलोपटक व्यवस्थापकीय जिम्मेवारीमा आएका माइकल अर्टेटामाथि यसले थप दबाब बनाएको छ ।
प्रिमियर लिग अन्तर्गत गएराति नै सम्पन्न अर्को खेलमा क्रिस्टियन बेन्टेके तथा विलफ्रेड जाहाको २/२ गोलको मद्धतमा क्रिस्टल प्यालेसले वेस्ट ब्रोम माथी ५-१ को जित निकालेको छ । भने लिसेस्टर सिटीले भार्डि तथा पेरेजको गोलमा शेफिल्ड माथि २-१ को जित निकालेको छ ।
यो सगै प्रिमियर लिगमा क्रिस्टल प्यालेस १६ अंक साथ ११ औं तथा लिसेस्टर २१ अंक साथ चौथो स्थानमा उक्लिएको छ । १ अंक मात्र जोडेको शेफिल्ड तालिकाको पुछारमा रहदा ६ अंक जोडेको वेस्ट ब्रोम एकस्थान माथि १९ औं स्थानमा छ।
